ମହାନଦୀ ଜଳ ବିବାଦ ସମାଧାନ – ପଦ୍ମ ଘୁଞ୍ଚି ଘୁଞ୍ଚି ଯାଉଛି* : ମହାନଦୀ ବଞ୍ଚାଓ ଆନ୍ଦୋଳନ

ମହାନଦୀ ଜଳ ବିବାଦ ସମାଧାନ – ପଦ୍ମ ଘୁଞ୍ଚି ଘୁଞ୍ଚି ଯାଉଛି : ମହାନଦୀ ବଞ୍ଚାଓ ଆନ୍ଦୋଳନ

ଭୁବନେଶ୍ୱର, ତା: ୧୧.୦୭.୨୦୨୦ମହାନଦୀ ଜଳ ବିବାଦର ସମାଧାନ ଦିଗରେ ମହାନଦୀ ଟ୍ରିବ୍ୟୁନାଲରେ ବିଶେଷକିଛି ଅଗ୍ରଗତି ପରିଲକ୍ଷିତ ନହେବା ଦୁଃଖର ବିଷୟ l ଆଜି ଟ୍ରିବ୍ୟୁନାଲର ଶୁଣାଣି ହୋଇଛି ଏବଂ ମହାନଦୀ ଜଳ ବିବାଦ ସମ୍ପର୍କିତ ୪୧ ଟି ପ୍ରସଙ୍ଗକୁ ବିଚାରକୁ ନେବା ପାଇଁ ଟ୍ରିବ୍ୟୁନାଲ ନିଷ୍ପତ୍ତି ନେଇଛନ୍ତି l ତା ସହିତ ଛତିଶଗଡ ସରକାରଙ୍କ ଆବେଦନ କ୍ରମେ କେନ୍ଦ୍ର ସରକାରଙ୍କୁ ଅଧିନସ୍ଥ କେନ୍ଦ୍ରୀୟ ଜଳ ଆୟୋଗ, ଆଇଏମଡ଼ି ଏବଂ ଭୂତଳ ଜଳ ଆୟୋଗ ଇତ୍ୟାଦିରୁ ମହାନଦୀ ସମ୍ପର୍କିତ ତଥ୍ୟ ଦେବା ପାଇଁ ନିର୍ଦ୍ଦେଶ ଦେଇଛନ୍ତି l କିନ୍ତୁ ୨୦୧୮ ମାର୍ଚ୍ଚ ମାସ ପାଖରୁ ମହାନଦୀ ଟ୍ରିବ୍ୟୁନାଲର ବିଚାର ପ୍ରକ୍ରିୟାର ଅଗ୍ରଗତିକୁ ଅବଲୋକନ କଲେ ଜଳ ବିବାଦ ସମାଧାନର ପଦ୍ମ ଘୁଞ୍ଚି ଘୁଞ୍ଚି ଯାଉଛି ବୋଲି ମନେ ହୁଏ l ବିଶେଷକରି ୨୦୧୮ ମସିହା ଡ଼ିସେମ୍ବର ମାସରେ ଆନ୍ତଃରାଜ୍ୟ ନଦୀ ଜଳ ବିବାଦର ତ୍ୱରିତ ସମାଧାନ ପାଇଁ ଏକକ ଟ୍ରିବ୍ୟୁନାଲ ସରକାର ଗଠନ କରିଥିଲେ l ଏହି ଏକକ ଟ୍ରିବ୍ୟୁନାଲର ନିୟମ ଅନୁସାରେ କୌଣସି ଆନ୍ତଃରାଜ୍ୟ ନଦୀ ଜଳ ବିବାଦ ବର୍ଷେ ଏବଂ ଅତିରିକ୍ତ ୬ ମାସ ବା ମୋଟ ୧.୫ ବର୍ଷ ଭିତରେ ସମାଧାନ ହେବା କଥା l କିନ୍ତୁ ମହାନଦୀ ଜଳ ବିବାଦ ସମାଧାନ କ୍ଷେତ୍ରରେ ଏହି ନିୟମ କ’ଣ ଲାଗୁ ହେଉନାହିଁ କି ? ଟ୍ରିବ୍ୟୁନାଲର ଶୁଣାଣି କାର୍ଯ୍ୟକ୍ରମ ଯେଉଁଭଳି ମନ୍ଥର ଗତିରେ ଚାଲିଛି ସେଥିରୁ ଟ୍ରିବ୍ୟୁନାଲର ଚୂଡାନ୍ତ ରାୟ କେବେ ପ୍ରକାଶ ପାଇବ ତାହା ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି lମହାନଦୀ ଜଳ ବିବାଦ ସଂକ୍ରାନ୍ତରେ ଖବର ୨୦୧୬ ମସିହାରେ ଲୋକଲୋଚନକୁ ଆସିବା ପରେ ଦୁଇଟି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଓଡ଼ିଶା ବାସୀଙ୍କୁ ଆନ୍ଦୋଳିତ କରିଥିଲା l ପ୍ରଥମ ଟି ହେଉଛି ଛତିଶଗଡ଼ ସରକାର ମହାନଦୀରେ ଅନେକ ବନ୍ଧ, ବ୍ୟାରେଜ ତଥା ନଦୀ ଉପତ୍ୟକା ପ୍ରକଳ୍ପ ଗୁଡ଼ିକୁ ବେଆଇନ ଭାବରେ ନିର୍ମାଣ କରିଥିଲେ l ଏହାଦ୍ୱାରା ତଳମୁଣ୍ଡରେ ଓଡ଼ିଶା ବାସୀ କ୍ଷତିଗ୍ରସ୍ତ ହେବାର ଅଭିଯୋଗ ଆସିଥିଲା l ଏହାଦ୍ୱାରା ମହାନଦୀର ତଳମୁଣ୍ଡରେ ଥିବା ଓଡ଼ିଶା ବାସୀ ଜଳ ସଙ୍କଟର ସମ୍ମୁଖୀନ ହେବା ସହିତ ନଦୀର ପର୍ଯ୍ୟାବରଣ ଗଭୀର ଭାବରେ ପ୍ରଭାବିତ ହେବାର ଆଶଙ୍କା କରାଯାଇଥିଲା l ଦ୍ଵିତୀୟତଃ ମହାନଦୀ ଜଳ ବିବାଦ ଟ୍ରିବ୍ୟୁନାଲ ଗଠିତ ହେଲାବେଳେ ଓଡ଼ିଶା ବାସୀଙ୍କ ପକ୍ଷରୁ ଦାବିଥିଲା ଯେ ଟ୍ରିବ୍ୟୁନାଲର ଚୂଡାନ୍ତ ରାୟ ପ୍ରକାଶ ପାଇବା ପର୍ଯ୍ୟନ୍ତ ଛତିଶଗଡ଼ କରିଥିବା ବେଆଇନ ପ୍ରକଳ୍ପ ଗୁଡ଼ିକୁ ସ୍ଥଗିତ ରଖାଯାଉ ଏବଂ ନିର୍ମାଣଧୀନ ପ୍ରକଳ୍ପ ଗୁଡ଼ିକର କାର୍ଯ୍ୟଜୁ ବନ୍ଦ ରଖାଯାଉ l ଆଶା କରାଯାଉଥିଲା ଟ୍ରିବ୍ୟୁନାଲ ତାଙ୍କର ଅନ୍ତରୀଣ ଆଦେଶ ମାଧ୍ୟମରେ କିଛି ନିର୍ଦ୍ଧିଷ୍ଟ ରାୟ ଏଇଦିଗରେ ଶୁଣାଇଥାନ୍ତେ l କିନ୍ତୁ ଦୁର୍ଭାଗ୍ୟର ବିଷୟ ଯେ ତାହା ଆଜି ପର୍ଯ୍ୟନ୍ତ ଟ୍ରିବ୍ୟୁନାଲ ବିଚାର କୁ ନେଲେ ନାହିଁ lମହାନଦୀ ଓଡ଼ିଶାର ଜୀବନରେଖା ଏବଂ ଏହାର ନିରନ୍ତର ପ୍ରବାହ ଓ ପର୍ଯ୍ୟାବରଣର ସୁରକ୍ଷା ଓଡ଼ିଶାର ଭବିଷ୍ୟତ ପିଢ଼ିଙ୍କ ପାଇଁ ଖୁବ ଗୁରୁତ୍ୱ ବହନ କରେ l ସେହିଦୃଷ୍ଟିରୁ ସମ୍ବେଦନଶୀଳତା ର ସହିତ ମହାନଦୀ ଜଳ ବିବାଦର ସମାଧାନ ମହାନଦୀ ବଞ୍ଚାଓ ଆନ୍ଦୋଳନ ଆଶା କରୁଛି l

ସୁଦର୍ଶନ ଦାସ
ଆବାହକ, ମହାନଦୀ ବଞ୍ଚାଓ ଆନ୍ଦୋଳନ

Leave a Reply

Your email address will not be published. Required fields are marked *